روح کب پھونکی گئی
ابن اسحاق روایت کرتے ہوئے فرماتے ہیں کہ : اللہ تعالی زیادہ جانتا ہے لیکن کہا گیا کہ اللہ تعالیٰ نے (آدم علیہ سلام )کا پتلا بنایا پھر اسے چھوڑ دیا اور اسے چالیس روز تک دیکھتا رہا یہاں تک کہ وہ مٹی ٹھیکرے کی طرح آواز دینے لگی اور بغیر پکائے ہی پختہ ہوگئی جب یہ ( آدم ) پتلا اچھی طرح پختہ ہو گیا تو اللہ تعالیٰ نے اس میں روح پھونکنے کا ارادہ فرمایا تو پتلے کو فرشتوں کے سامنے کیا اور کہا کہ جب میں اس میں روح پھونک دوں تو تم اس کے سامنے سجدہ میں گر جانا
حضرت ابو ہریرہ (رضی اللہ العنہ) سے روایت ہے کہ نبی نے ارشاد فرمایا
اللہ تعالیٰ نے آدم (آدم علیہ سلام )کو اپنے دست قدرت سے بنایا اور ان میں روح پھونکی اور فرشتوں کی ایک جماعت کو حکم دیا کہ انہیں سجدہ کریں پس انہوں نے سجدہ کیا مگر ابلیس نے سجدہ کرنے سے انکار کر دیا پھر آدم(آدم علیہ سلام ) بیٹھ گئے اور انہیں چھینک آئی جس پر انہوں نے الحمد للہ کہا اللہ تعالیٰ نے جواب میں فرمایا تیرا رب تجھ پر رحم کرے
جب فرشتوں کے سامنے ابلیس کا تکبر اور نافرمانی ظاہر ہوگئی تو اللہ تعالیٰ نے عتاب فرمایا ( جسے اس نے اپنی بے عزتی جانا ) اور اپنے گناہ پر بضد رہا اور اس نے سرکشی اور بغاوت پر کمر باندھ لی اللہ تعالیٰ نے اس پر لعنت فرمائی اور اسے جنت سے نکال دیا اسے راندہ درگاہ کر دیا اور آسمان وزمین کی بادشاہت کا اعزاز اس سے چھین لیا اور جنت کی نگہداری سے ہٹا دیا
ابن عباس (رضی اللہ العنہ)ابن مسعود (رضی اللہ العنہ)اور چند دیگر صحابہ کرام سے مروی ہے کہ ابلیس کو جنت سے نکالا گیا جب اس پر پھٹکار پڑی اور آدم کو جنت میں ٹھکا نہ دیا گیا تو وہاں انہوں نے تنہائی محسوس کی کیونکہ وہاں ان کا کوئی ہمسر نہ تھا جس سے وہ سکون حاصل کرتے
پس وہ ایک رات سوئے جب بیدار ہوئے تو اپنے سرہانے ایک عورت کھڑی دیکھی جس کو اللہ تعالیٰ نے ان کی پسلی سے پیدا فرمایا تھا آدم (آدم علیہ سلام )نے اس سے پوچھا ” تم کون ہو؟
وہ کہنے لگی عورت
پو چھا کس لیے پیدا کی گئی ہو؟
کہنے لگی تا کہ تو مجھ سے سکون حاصل کرے۔
فرشتوں کو جب اس واقعہ کی خبر ہوئی تو وہ دیکھنے کے لیے آئے اور کہا اے آدم(آدم علیہ سلام ) اس کا نام کیا ہے؟
”حوا‘
انہوں نے متعجب ہو کر پوچھا یہ نام کیوں رکھا آدم نے کہا اس لیے کہ وہ زندہ آدم سے پیدا کی گئی ہے۔
قرآن مجید میں اللہ تعالیٰ کا فرمان ہے
پھر ہم نے آدم سے کہا تم اور تمہاری بیوی دونوں جنت میں رہو اور یہاں بفراغت جو چاہو کھاؤ مگر اس درخت کا رخ(نہ کرنا ورنہ ظالموں میں شمار ہو گئے ۔ (سورۃ البقرہ آیت ۳۵
پس شیطان نے ان کے دل میں وسوسہ ڈالا اور اس درخت کا پھل کھانا ان کی نگاہوں میں فائدہ مند اور خوبصورت ٹھہرا دیا اور گناہ کو ان کے لیے انتہائی پرکشش بنا دیا یہاں تک کہ ان دونوں نے اسے کھا لیا جس کے بعد ان کے اجسام کے پوشیدہ حصے عریاں ہو گئے یعنی وہ ( دونوں ) بے لباس ہو گئے ۔
وہب بن منبہ سے مروی ہے کہ
اللہ تعالیٰ نے جب آدم و حواعلیہا السلام کو جنت میں رہائش عطا فرمادی اور ایک درخت کو ان کے لیے ممنوع قرار دے دیا ۔ ممنوعہ درخت کی شاخیں پھیلی ہوئی تھیں اور فرشتے اس کا پھل کھاتے تھے تا کہ وہ ابدی حیات کے مستحق ٹھہریں مگر آدم اور حوا کو اس کا پھل کھانے سے منع فرما دیا گیا۔ پس جب ابلیس نے ان کو پھیلانے اور گناہ کے مرتکب کرنے کا ارادہ کیا تو وہ سانپ کے پیٹ میں داخل ہوا سانپ اس وقت چار ٹانگوں پر بختی اونٹ کی طرح چلتا تھا اور بہت خوبصورت معلوم ہوتا ہے۔ جب سانپ جنت میں داخل ہو گیا تو ابلیس اس کے پیٹ سے باہر نکلا اور اس ( ممنوعہ ) درخت کا پھل لے کر حضرت حوا کے پاس آیا اور کہنے لگا اس پھل کی طرف دیکھو اس کی خوشبو کتنی اچھی ہے اس کا ذائقہ کتنا اچھا اور رنگ کتنا خوبصورت ہے۔ پس حوا نے اسے لیا اور کھا لیا پھر حوا حضرت آدم کے پاس پہنچیں اور کہنے لگیں اس پھل کی طرف دیکھو اس کی خوشبو کتنی اچھی اس کا ذائقہ کتنا عمدہ اور رنگ کیسا دلفریب ہے ۔ پس آدم نے بھی کھا لیا۔ اس کے فوری بعد ان دونوں ( آدم و حوا علیہا السلام) کے پوشیدہ اعضاء ظاہر ہو گئے
اللہ تعالیٰ نے آواز دی اے آدم تم کہاں ہو ۔ آدم نے جواب دیا " اے میرے رب ! میں یہاں ہوں فرمایا ”باہر کیوں نہیں نکلتے آدم کہنے لگے ” میں آپ سے حیا کرتا ہوں فرمایا یہ درخت زمین میں سب سے زیادہ ملعون ہو گا اس پر لعنت پیدا کر دی گئی ہے۔ اب اس کے پھل کانٹوں میں تبدیل ہو جائیں گے نیز فرمایا کہ اس وقت جنت اور زمین میں کیکر اور بیر کے درخت سے زیادہ افضل کوئی درخت نہ تھا پھر فرمایا اے حوا ! تم نے میرے بندے کو دھوکا دیا لہذا حمل کا زمانہ تمہارے لیے (بطور سزا) مقرر کیا گیا اور اس میں تم بڑی مشقت اور تکالیف اٹھاؤ گی اور جب وضع حمل کا وقت ہوگا تو تم درد کی شدت سے اپنے آپ کو موت کے دہانہ پر پاؤ گی اور سانپ سے فرمایا: تم نے ابلیس لعین کو اپنے پیٹ میں داخل کیا جس کی وجہ سے وہ میرے بندے کو دھوکہ دینے میں کامیاب ہو گیا لہذا تجھ پر لعنت ہو۔ تیری ٹانگیں تیرے پیٹ میں داخل ہو جائیں گی اور تیری خوراک مٹی ہوگی ۔ تجھ میں اور اولاد آدم میں دشمنی ہوگی۔ جہاں بھی تو انہیں نظر آئے گا وہ اپنی ایڑی سے تیرا سر چل دیں گے اور جہاں وہ تجھے دکھائی دیں گے تو اپنے جبڑوں سے اسے ڈسے گا۔
Comments
Post a Comment